ລາຍງານເພີ່ມເຕິມຄະດີພົບສົບຍິງສາວຊາວຫວຽດນາມເສຍຊີວິດຢູ່ກ້ອງຂົວຂ້າມແມ່ນໍ້າຂອງ ທີ່ແຂວງຈໍາປາສັກ

ທ່ານ ພັນໂທ ໄພຈິດ ໄຊຍະເດດ ຮອງຫົວໜ້າຫ້ອງຕຳຫຼວດ ຜູ້ຊີ້ນຳວຽກງານສືບສວນສອບສວນກອງບັນຊາການ ປກສ ແຂວງຈຳປາສັກ ລາຍງານໃຫ້ຮູ້ວ່າ: ເວລາ 9 ໂມງຂອງວັນທີ 29 ເມສາ 2018 ໄດ້ຮັບລາຍງານຈາກພົນລະເມືອງດີວ່າ: ໄດ້ພົບເຫັນສົບຄົນຕາຍໄຫຼນ້ຳຢູ່ສົ້ນຂົວຂ້າມແມ່ນ້ຳຂອງລາວ-ຍີ່ປຸ່ນ ເຂດບ້ານໂພນກຸງເມືອງປາກເຊ ຈາກນັ້ນ ທາງເຈົ້າໜ້າທີ່ຈິ່ງໄດ້ປະສານສົມທົບກັບພາກສ່ວນທີ່ກ່ຽວຂ້ອງ ລົງກວດກາສະຖານທີ່ເກີດເຫດ ຈິ່ງຮູ້ວ່າຜູ້ເສຍຊີວິດຊື່ ນາງ ຫງວຽນກິມເກ່ ອາຍຸ 25 ປີ ອາຊີບກຳມະກອນ ສັນຊາດຫວຽດນາມ ຢູ່ບ້ານ ເອິນແທັງຮີ ຄຸ້ມແທັງດຽນ ເມືອງ ຫຽນເຈົາແທັງ ແຂວງເຕີ່ຍນິ່ງ ສສ ຫວຽດນາມ ໄດ້ມາພັກເຊົາຢູ່ບ້ານໂພນກຸງ ເມືອງປາກເຊ ແຂວງຈຳປາສັກ.

ຜ່ານການສືບສວນສອບສວນ ນາງ ເຈິນກິມເຮືອງ ຜູ້ເປັນເອື້ອຍ ມີອາຊີບຄ້າຂາຍ ພັກເຊົາຢູ່ບ້ານໂພນສະຫວັນ ເມືອງປາກເຊ ໃຫ້ການວ່າ: ໃນປີ 2011 ນາງ ເຈິນກິມເຮືອງ ອາຍຸ 35ປີ ແລະ ຜົວ ຊື່ ທ້າວ ຫວໍວັນເຢີ ອາຍຸ 37ປີ ສັນຊາດຫວຽດນາມໄດ້ມາຄ້າຂາຍຢູ່ເມືອງປາກເຊ. ຈົນຮອດປີ 2016 ນ້ອງສາວຊື່ ນາງ ຫງວຽນກິມເກ່(ຜູ້ເສຍຊີວິດ) ກໍ່ໄດ້ມາຢາມຢູ່ເມືອງປາກເຊ. ຈາກນັ້ນ ນາງ ຫງວຽນກິມເກ່ ກໍ່ໄປຕິດຕໍ່ເປັນລູກຈ້າງຂາຍເສື້ອຜ້ານຳນາງ ວໍທິເວີນ ສັນຊາດຫວຽດນາມ ອາຍຸ 44ປີ ຄ້າຂາຍຢູ່ບ້ານໂພນກຸງເມືອງປາກເຊ ເຊິ່ງໃນລະຫວ່າງນີ້ ນາງ ຫງວຽນກິມເກ່ ແມ່ນໄດ້ທຽວໄປໆມາໆ ລະຫວ່າງເມືອງປາກເຊ ກັບ ປະເທດຫວຽດນາມເປັນປະຈຳ. ຕົກມາຮອດເດືອນຕຸລາ ປີ 2017 ນາງ ຫງວຽນກິມເກ່ ໄດ້ມາຮູ້ຈັກຮັກກັນກັບທ້າວ ຮວນ ອາຍຸ 20ປີ ສັນຊາດຫວຽດນາມ ທີ່ມາຫາເຮັດອາຊີບຕີຄຳຢູ່ເມືອງປາກເຊ. ຈາກນັ້ນ ຮອດຕົ້ນເດືອນກຸມພາ ປີ 2018 ທາງພໍ່ແມ່ ທ້າວ ຮວນ ໄດ້ຮູ້ວ່າທັງສອງມັກຮັກກັນແບບຊູ້ສາວແລ້ວຈິ່ງບອກໃຫ້ເລີກກັນ.ຈິ່ງເຮັດໃຫ້ ນາງ ຫງວຽນກິມເກ່ ເກີດຄວາມໂສກເສົ້າເສຍໃຈ.

ຮອດວັນທີ 4 ເມສາ 2018 ນາງ ເຈິນກິມເຮືອງຜູ້ເປັນເອື້ອຍໄດ້ພາ ນາງ ຫງວຽນກິມເກ່ ໄປກວດແລ້ວຮູ້ວ່າ ນາງ ຫງວຽນກິມເກ່ ຖືພາ. ຈາກນັ້ນ ທ້າວ ຮວນ ໄດ້ບອກ ນາງ ຫງວຽນກິມເກ່ ວ່າຈະໄປຫາພໍ່ແມ່ແລ້ວມາຂໍຜູ້ກ່ຽວແຕ່ງງານ.ພາຍຫຼັງໄປຫາພໍ່ແມ່ແລ້ວ ທາງຄອບຄົວ ທ້າວ ຮວນ ບໍ່ອະນຸຍາດໃຫ້ ທ້າວ ຮວນ ແຕ່ງງານກັບ ນາງ ຫງວຽນກິມເກ່ ພ້ອມທັງໃຫ້ລູກຊາຍໄປເຮັດວຽກຢູ່ນະຄອນຫຼວງວຽງຈັນ. ເມື່ອເປັນແນວນັ້ນ ນາງ ຫງວຽນກິມເກ່ ໄດ້ເກີດອາການຊຶມເສົ້າ,ບໍ່ປາກບໍ່ເວົ້ານຳໃຜມີແຕ່ນອນໃຫ້ໃນຫ້ອງຄົນດຽວ.


ຕົກຮອດວັນທີ 10 ເມສາ 2018 ນາງ ຫງວຽນກິມເກ່ ໄດ້ຕັດສິນໃຈກິນຢາເອົາລູກອອກ, ຈາກນັ້ນ ນາງ ຫງວຽນກິມເກ່ ກໍ່ໄດ້ໄປຂາຍເຄື່ອງຢູ່ທີ່ຮ້ານ ນາງ ວໍທິເວີນ ບ້ານໂພນກຸງເມືອງປາກເຊ ແລະ ໄດ້ພັກຢູ່ທີ່ນັ້ນ.ຈົນມາຮອດວັນທີ 27 ເມສາ 2018 ເວລາ 18 ໂມງ ນາງ ເຈິນກິມເຮືອງ ຜູ້ເປັນເອື້ອຍ ໄດ້ກັບມາແຕ່ຂາຍເຄື່ອງຢູ່ເມືອງຈຳປາສັກ ແລ້ວໄປຫາ ນາງ ຫງວຽນກິມເກ່ ຢູ່ທີ່ຮ້ານຂາຍເສື້ອຜ້າຂອງ ວໍທິເວີນ ແລ້ວຖາມນ້ອງສາວວ່າ: “ກິນເຂົ້າແລ້ວບໍ?” ແຕ່ນາງ ຫງວຽນກິມເກ່ ຜູ້ເປັນນ້ອງສາວບໍ່ຕອບ, ຜູ້ກ່ຽວມີແຕ່ໄຫ້ແລ້ວແລ່ນຂຶ້ນໄປນອນ. ຈາກນັ້ນ ນາງ ເຈິນກິມເຮືອງ ຈິ່ງກັບເມືອເຮືອນ.

ນາງ ວໍທິເວີນ ໃຫ້ການຕື່ມອີກວ່າ ຕໍ່ຈາກນັ້ນມາຂອງມື້ນັ້ນເວລາປະມານ 22ໂມງ ຕົນເອງກຳລັງຈະປິດຮ້ານໄດ້ເຫັນ ນາງ ຫງວຽນກິມເກ່ ນຸ່ງຊຸດນອນສາຍດ່ຽວ ແລະ ນຸ່ງເສື້ອແຂນຍາວສີເທົາປົກນອກ,ນຸ່ງໂສ້ງຂາສັ້ນສີບົວ ກຳລັງຍ່າງຂ້າມທາງໄປແຄມຂອງ ຕົນເອງຈິ່ງໄດ້ຮ້ອງໃສ່ວ່າ: “ເຂົ້າມານອນທະແມ” ນາງ ຫງວຽນກິມເກ່ ຕອບວ່າໄປນັ່ງຫຼິ້ນກ່ອນຢູ່ນອກອາກາດເຢັນ. ຈາກນັ້ນຕົນເອງຈິ່ງໄດ້ໄປອາບນ້ຳແລ້ວກັບມາເຫັນແຫວນທີ່ ທ້າວ ຮວນ ຊື້ໃຫ້ປົງຢູ່ໂຕະກິນເຂົ້າ ແລ້ວຕົນເອງກໍ່ໄດ້ເຂົ້າໄປເບິ່ງຫ້ອງນອນ ນາງ ຫງວຽນກິມເກ່ ຈິ່ງເຫັນແຕ່ໂທລະສັບປະໄວ້ໃນຫ້ອງ ຈາກນັ້ນຕົນກໍ່ໄດ້ອອກຕາມຫາ ນາງ ຫງວຽນກິມເກ່ ແຕ່ກໍ່ບໍ່ເຫັນ ຕໍ່ມາຈິ່ງໄດ້ສົ່ງຂໍ້ຄວາມທາງ MESSENGER ໄປຫາ ທ້າວ ຮວນ ແຕ່ ທ້າວ ຮວນ ຕອບວ່າບໍ່ເຫັນ,ນ້ອງມາເຮັດວຽກຢູ່ວຽງຈັນພີ້.

ເມື່ອເປັນແນວນັ້ນ ພໍຮອດເວລາ 23 ໂມງ 30 ນາທີ ນາງ ວໍທິເວີນ ຈິ່ງໄດ້ໂທລະສັບໄປບອກ ນາງ ເຈິນກິມເຮືອງ ວ່າບໍ່ເຫັນ ນາງ ຫງວຽນກິມເກ່ ຕໍ່ມາຈິ່ງໄດ້ພາກັນອອກຊອກຫາຕາມຕົວເມືອງປາກເຊ ແຕ່ກໍ່ບໍ່ເຫັນ. ຈົນມາຮອດວັນທີ 29 ເມສາ 2018 ຈິ່ງຮູ້ຂ່າວວ່າມີຄົນຕາຍໄຫຼນ້ຳ ຢູ່ສົ້ນຂົວຂ້າມແມ່ນ້ຳຂອງລາວ-ຍີ່ປຸ່ນ ເຂດບ້ານໂພນກຸງເມືອງປາກເຊ ຈາກນັ້ນ ທາງ ນາງ ເຈິນກິມເຮືອງ ຜູ້ເປັນເອື້ອຍ ຈິ່ງໄດ້ອອກໄປເບິ່ງແລ້ວພົບວ່າເປັນສົບຂອງນາງ ຫງວຽນກິມເກ່ ຜູ້ເປັນນ້ອງສາວ.


ທ່ານ ພັນໂທ ໄພຈິດ ໄຊຍະເດດ ລາຍງານໃຫ້ຮູ້ອີກວ່າ: ຜ່ານການສືບສວນສອບສວນ ແລະ ລົງກວດກາສັນລະສູດສົບຂອງເຈົ້າໜ້າທີ່ວິຊາສະເພາະເຫັນວ່າການເສຍຊີວິດຂອງ ນາງ ຫງວຽນກິມເກ່ ແມ່ນບໍ່ມີຮ່ອງການຄາຕະກຳ ອີງຕາມການສັນລະສູດຊາກສົບເບື້ອງຕົ້ນຈາກການເສຍຊີວິດແມ່ນການຕົກນ້ຳເຮັດໃຫ້ຂາດອາກາດຫາຍໃຈ. ປັດຈຸບັນ ທາງເຈົ້າໜ້າທີ່ຈະໄດ້ນຳເອົາໂທລະສັບຂອງ ນາງ ຫງວຽນກິມເກ່ ໄປປົດລອ໋ກ ເພື່ອກວດກາເກັບກຳຂໍ້ມູນ ແລະ ສອບສວນເກັບກຳຂໍ້ມູນເພີ່ມຕື່ມນຳ ທ້າວ ຮວນ ຜູ້ເປັນແຟນ.

ຂໍ້ມູນ : ໜັງສືພິມຈຳປາໃໝ່

 

Leave a Reply

Your email address will not be published. Required fields are marked *

Show Buttons
Hide Buttons