ເຈົ້າຫນ້າທີ່ສາທາລະນະສຸກສົມທົບຫນ່ວຍສະເພາະກິດຈັບແພດເຖື່ອນຊາວຈີນພ້ອມຂອງກາງຢາປິ່ນປົວ

ເຈົ້າຫນ້າທີ່ສາທາລະນະສຸກສົມທົບຫນ່ວຍສະເພາະກິດດັກສະກັດ ແລະ ຈັບແພດເຖື່ອນຊາວຈີນພ້ອມຂອງກາງຢາປິ່ນປົວ ແລະ ອຸປະກອນການແພດສາລະພັດຢ່າງຊຸກເຊື່ອງໄວ້ກົ້ນລົດເກງເພື່ອຕົບຕາຫລົບຫລີກເຈົ້າຫນ້າທີ່ ຂະນະທີ່ແພດລາຍນີ້ໄດ້ມີການເຄື່ອນໄຫວມາດົນເຕີບແລ້ວ.

ທ່ານ ສີໄພ ສິດທິວົງ ຮອງຫົວຫນ້ຫ້ອງການສາທາເມືອງນໍ້າບາກ ແຂວງຫລວງພະບາງໃຫ້ຮູ້ວ່າ: ເວລາປະມານ 13:00 ນາທີ ຂອງວັນທີ 20 ມິຖຸນາ 2018 ນີ້ ຫ້ອງການສາທາລະນະສຸກເມືອງ ຮວ່ມກັບເຈົ້າຫນ້າທີກອງບັນຊາການປ້ອງກັນຄວາມສະຫງົບເມືອງ ໄດ້ລົງກວດແພດເຖື່ອນຢູ່ຕະຫລາດຂອງເມືອງນໍ້າບາກ ແຂວງຫລວງພະບາງໄດ້ດັກຈັບແພດເຄື່ອນທີ່ເຖື່ອນໂດຍອາໃສພາຫະນະລົດເກງຄັນສີແດງແລນເລາະຕາມບ້ານຕ່າງໆເພື່ອຕົວະຕົ້ມ ແລະ ຫລອກລວງປິ່ນປົວປະຊາຊົນ.

ຜ່ານການກວດກາພົບຄົນສັນຊາດຈີນ 2ຄົນ, ຄົນລາວ 1 ຄົນ ທີ່ເປັນຜູ້ແປພາສາ ເຊີ່ງໄດ້ເລາະເຄື່ອນໄຫວຂາຍຢາ, ບໍລິການໃສ່ແຂ້ວ, ກວດພະຍາດ ໂດຍທີ່ບໍ່ມີໃບອານຸຍາດນຳເຂົ້າດ້ານການຢາ ແລະ ອຸປະກອນການແພດ, ບໍ່ມີໃບປະກາຊະນີຍະບັດດ້ານການແພດ, ບໍ່ມີໃບປະກອບອາຊີບດ້ານ ການປີ້ນປົວ ພ້ອມທັງກວດພົບຢາຈຳນວນ 30 ກວ່າຊະນິດ ທີ່ເປັນຢາສະຫນູນໄພ, ປະເພດຢາເມັດທີ່ຫມົດອາຍຸການນຳໃຊ້ ແລະ ມີຢາຕ້ອງຫ້າມອີກຈຳນວນວນຫນື່ງ. ໂດຍໃນຢາເມັດດຽວປະກອບມີຢາປາລາ,ແອສໄພລິນ, ຄາເຟອິນ, ຢາແກ້ປວດ ຖ້າຫາກກິນເຂົ້າໄປຈະເປັນອັນຕະລາຍຕໍ່ສຸຂະພາບໃນໄລຍະຍາວ.

ດັ່ງນັ້ນຫ້ອງການສາທາລະນະສຸກເມືອງນ້ຳບາກພ້ອມກັບວິຊາການຂອງກອງບັນຊາການປ້ອງກັນຄວາມສະຫງົບເມືອງ ຈີ່ງໄດ້ກັກຕົວເພື່ອມາດຳເນີນຄະດີ ພ້ອມທັງຍຶດຢາ, ອຸປະກອນຕ່າງໆ ເພື່ອໄປທຳລາຍຖີ້ມ. ຕໍ່ກັບບັນຫາດັ່ງກ່າວ ຂໍຮຽກຮ້ອງມາຍັງພໍ່ແມ່ປະຊາຊົນທຸກໆທ່ານ ທີ່ໄດ້ຫລົງເຊື່ອກວດພະຍາດ ແລະ ຊື້ຢາໄປກິນນັ້ນ ແມ່ນຫ້າມກິນເດັດຂາດ ໃຫ້ເອົາຖື້ມ. ຕາມການກວດກາດ້ານວິຊາການແພດແລ້ວ ແມ່ນເປັນຢາອັນຕະລາຍຕໍ່ສຸຂະພາບຢ່າງຮ້າຍແຮງ.

Leave a Reply

Your email address will not be published. Required fields are marked *

Show Buttons
Hide Buttons